«Жайкы жомоктор» китеби жөнүндө маалымат

Кымбаттуу балдар жана ата-энелер!

Ар бир бала өз турмушун жомоктогудай болсо деп ойлойт. Кандай бала болбосун мейли ал чыйрак, шамдагай, көп нерселерди түшүнө билген гениалдуу болсун, кечкурун уктаар алдында ар бир кичинекей бөбөктөр сыяктуу эле энесинен бешик ырын ырдап, же жомок айтып берүүсүн суранат. Колунардагы «Кечки жомоктор» сериясы ушул максатта түзүлүп, сунушталды. Ал «Кыш жомоктору», «Жаз жомоктору», «Жайкы жомоктор» жана «Күз жомоктору» аталган төрт жыйнактан турат

Биздин «Кутаалам» басмасы «Кечки жомоктор» сериясынын китептерин чыгарууну улантат. Бул китеп ошол сериянын «Жайкы жомоктор» деп аталган үчүнчү жыйнагы. Жай күндөрү жылдын жан-жаныбарларга жагымдуу мезгили болуп, бизге нурларын чачып, кайталангыс кереметтерин тартуулайт. Айланабыз ажайып кооздукка бөлөнөт! Чөптөр, дарактар, майда бадалдардан бери бардыгы жашыл дүйнөгө оронот! Ал эми таажылары бажырая ачылган көркөмү көз жоосун алган кызыл-тазыл түркүн гүлдөрүчү! Берекеси мол жаратылыш жайдын күнү биздин дасторконубузга көптөгөн жашылчаларын, мөмө-жемиштерин тартуулайт!

Жай мезгили - бардыгыбыз көпкө күткөн жайкы каникулдар менен эс алуу күндөрү. Жайкы эс алуу учурунда жомоктордогу окуялары жай мезгилине багышталган биздин ушул китепти ала кетүүңөрдү сунуштайбыз. Бул жомоктор силерди жаны каармандар менен жолуктуруп, жагымдуу жаңы  таасирлерди тартууларына ишенебиз!

«Жайкы жомокторго» керемет сапарынар байсалдуу болсун!