«Китептен корккон бала» китеби жөнүндө маалымат

Ардактуу окурман журту, силер сүйүп, ай сайын күтүп окуган «Баластан» интерактив журналы жөн эле журнал эмес, ал журнал - «Баластан» деген чоң долбоордун бир бутагы. Чоң долбоорубуздун миссиясы: «Балдарга жалпы адамзат баалуулуктарын жана кыргызча ой жүгүртүүнү үйрөтүү!» Биздин кыялыбыз (vision): «Баластан миллион баланын дүйнөсү!» Биз миссиябызды миллион балага жеткирүү үчүн 6 багытта иш алып барабыз. Анын биринчиси 2013-жылдан бери чыгып келген «Баластан» интерактив журналы болсо, экинчиси «Баластан» китептери багытында балдар үчүн мыкты чыгармаларды, сонун котормолорду китеп кылып чыгаруу. Буга чейин да бир топ балдар китептерин чыгарганбыз. Учурда колуңузда италиялык жазуучу Сюзанна Тамаронун эң сонун дүйнөлүк балдар китеби «Китептен корккон бала» аңгемеси турат. COVID-19 пандемиясынан кийинки биринчи эмгегибиз. Бул китеп балаңызды китептер дүйнөсүнө коркпой, кызыгуу менен саякаттаганга багыт берет деген үмүттөмүн. Биз сизди, үй-бүлөңүздү жана сиздин балдарды китептер дүйнөсүнө чакырып жатып, алгач ушул китепти окууну сунуштайбыз. Китепти окунуз, балаңызды тааныңыз, жакшы ишти баштаарда талдаңыз, айтор бир көз жүгүртүп алыңыз! Китептер дүйнөсүнөн көрүшкөнчө!